SHSKUK mbyll mbledhjet e Bordit për publikun, vendimi bazohet në opinion ministror

Shërbimi Spitalor dhe Klinik Universitar i Kosovës (SHSKUK) ka njoftuar se mbledhjet e Bordit Drejtues do të vazhdojnë të mbahen pa praninë e mediave dhe publikut, një muaj pas ndryshimit të qasjes ndaj transparencës.

Në njoftimin e lëshuar, institucioni ka bërë të ditur se ky veprim ndërmerret bazuar në një opinion ligjor të pranuar nga Departamenti Ligjor i ministrisë përgjegjëse, megjithatë në komunikatë nuk është cituar asnjë ligj konkret dhe nuk është bashkangjitur dokumenti i ministrisë. Për vendimet dhe çështjet e trajtuara, SHSKUK ka theksuar se opinioni do të njoftohet përmes kanaleve zyrtare.

Nga ana e saj, njohësja e politikave shëndetësore, Saranda Ramaj, ka rikujtuar se hapja e mbledhjeve në vitin 2023 ishte arsyetuar me nevojën për transparencë. Ajo vlerëson se rikthimi i praktikës së mbledhjeve të mbyllura lidhet me kritikat e drejtuara ndaj menaxhimit dhe mënyrës se a duhet dhënë apo kërkuar llogari brenda këtyre takimeve. Sipas saj, megjithëse Ligji për Procedurën e Përgjithshme Administrative parasheh mbledhje të mbyllura për organet kolegjiale, ai lë hapësirë edhe për rregulla të tjera ligjore që mund të lejojnë hapjen e tyre.

Gjatë periudhës kur mbledhjet kanë qenë të hapura, në opinion janë pasqyruar probleme të ndryshme të spitaleve rajonale dhe QKUK-së, përfshirë sfidat me furnizimet, mungesën e investimeve kapitale dhe gjendjen e rënduar infrastrukturore të ngritura nga drejtorët e klinikave. Lidhur me këtë çështje, as ministria dhe as SHSKUK nuk kanë kthyer përgjigje ndaj pyetjeve për të siguruar opinionin ligjor dhe arsyet e këtij vendimi.