LDK pranon ftesën e Kurtit për takim, PDK dhe Aleanca refuzojnë

Partia fituese e zgjedhjeve të 7 qershorit 2026, Vetëvendosje, u ka dërguar ftesa për takim tri subjekteve opozitare shqiptare. Lidhja Demokratike e Kosovës ka konfirmuar pjesëmarrjen, ndërsa Partia Demokratike e Kosovës dhe Aleanca për Ardhmërinë e Kosovës e kanë refuzuar ftesën.

Kryetari i PDK-së, Bedri Hamza, në përgjigjen dërguar drejtuesit të Vetëvendosjes, Albin Kurti, ka theksuar se në rrethanat aktuale subjekti i tij synon të mbetet në opozitë. Ai ka kërkuar që partia fituese, në bashkëpunim me partitë e tjera parlamentare, të gjejë rrugën për krijimin e institucioneve të reja.

Në anën tjetër, kryetari i Aleancës, Ardian Gjini, ka bërë të ditur se partia e tij nuk i sheh të arsyeshme takimet në këtë format dhe ka përjashtuar mundësinë e pjesëmarrjes në Qeveri apo në takime, duke kërkuar përfshirjen e gjashtë kushteve strategjike në programin qeverisës.

Zëdhënësi i LDK-së, Besian Mustafa, ka konfirmuar takimin mes Albin Kurit dhe kryetarit të LDK-së, Lumir Abdixhiku, i cili do të zhvillohet të martën në orën 18:00. Ky vendim pason kuvendin e kësaj partie, ku u rikonfirmua kryetari dhe u kërkua që deputetët të kontribuojnë në themelimin e institucioneve sipas vendimeve të strukturave.

Pavarësisht kundërshtimeve të hershme nga disa deputetë të zgjedhur të LDK-së ndaj bisedimeve me Kurtin, deputetët Janina Ymeri dhe Ermal Sadiku kanë theksuar se do të veprojnë në përputhje me qëndrimet e grupit parlamentar dhe organeve partiake. Ndërkohë, analisti politik Dritëro Arifi ka vlerësuar se ky detyrim i deputetëve ndaj strukturave bie ndesh me parimet e demokracisë.

Pas konstituimit të Kuvendit të Kosovës, nisin afatet ligjore për krijimin e Qeverisë së re, si dhe periudha prej 60 ditësh për zgjedhjen e presidentit të ardhshëm të vendit.