Abdixhiku: Ka përafrime me Vetëvendosjen, por mbeten dallimet thelbësore

Kryetari i Lidhje Demokratike të Kosovës, Lumir Abdixhiku, ka bërë të ditur se dialogu me Lëvizjen Vetëvendosje për krijimin e institucioneve të reja është duke vijuar, teksa theks i veçantë po i vihet parandalimit të një procesi të ri zgjedhor, të cilin e ka vlerësuar si të dëmshëm për vendin.

Duke folur rreth përpjekjeve aktuale, ai theksoi se gjetja e një gjuhe të përbashkët kërkon kohë dhe angazhim, me qëllim që të mbrohen interesat e qytetarëve. Sipas tij, shkuarja në zgjedhje përbën dëmin më të madh që mund t'i shkaktohet Republikës, ndaj po punohet intensivisht për të arritur një marrëveshje.

Kreu i LDK-së paralajmëroi se kontaktet mes dy subjekteve do të vijojnë edhe gjatë ditëve në vijim. Ai bëri të theksuar se, pavarësisht përafrimeve në disa fusha, ende ekziston një distancë sa i përket çështjes kryesore që lidhet me balancën demokratike. Megjithatë, ai shtoi se konstituimi i Kuvendit duhet të ndodhë dhe se vetë vazhdimi i takimeve përbën një sinjal pozitiv.

Në anë tjetër, përfaqësues të LDK-së kanë bërë publike qëndrimin e partisë lidhur me synimin për të siguruar postin e presidentit.