Haxhiu paralajmëron nisjen e bisedimeve mes VV-së dhe LDK-së për presidentin

Ushtruesja e detyrës së presidentit, Albulena Haxhiu, ka paralajmëruar se gjatë periudhës në vijim do të organizohet një takim mes Lëvizjes Vetëvendosje dhe Lidhjes Demokratike të Kosovës. Pas bisedave me subjektet parlamentare, ku opozita nuk mori pjesë, ajo bëri me dije se kreu i Vetëvendosjes e ka informuar për një ftesë që do t'i drejtohet LDK-së.

Në anën tjetër, LDK-ja kishte anashkaluar ftesën paraprake duke theksuar se e sheh Haxhiun vetëm në cilësinë e deputetes dhe duke kërkuar bisedime të drejtpërdrejta me Albin Kurtin. Ndërkaq, PDK-ja dhe AAK-ja kanë insistuar fillimisht në konstituimin e Kuvendit para se të hapen diskutimet për temat e tjera.

Duke iu referuar qëndrimeve të deritanishme, Haxhiu përmendi kërkesën e LDK-së për një udhëheqës shteti konsensual dhe jopartiak. Ajo shtoi se kreu i Vetëvendosjes ka theksuar se nuk synon një kandidat nga radhët e partisë së tij. Gjatë paraqitjes para mediave, ajo bëri thirrje për përfshirjen e të gjitha subjekteve politike në dialog, duke vlerësuar se refuzimi nuk kontribuon në arritjen e konsensusit, ndërkohë që qytetarët kërkojnë ngritjen e institucioneve të reja.

LDK-ja mbetet e vetmja forcë politike që ka zhvilluar negociata me Kurtin, ndërsa së fundmi ka hequr dorë nga pakti i mëparshëm politik, duke kaktuar si kusht zgjedhjen e një presidenti me konsensus dhe pa përkatësi partiake.