Aksident tragjik në Kliqinë të Pejës: Një viktimë dhe katër të lënduar
Një person ka vdekur dhe katër të tjerë kanë pësuar lëndime trupore pas një përplasje mes tri veturave në aksin rrugor Pejë–Prishtinë.
Një jetë ka humbur dhe katër persona të tjerë kanë marrë lëndime si pasojë e një aksidenti rrugor që ka ndodhur në fshatin Kliqinë të Pejës, në drejtim të rrugës për Prishtinë. Ngjarja është konfirmuar nga Policia e Kosovës.
Fadil Gashi, zëdhënës i policisë për rajonin e Pejës, ka bërë të ditur se në këtë ngjarje tragjike janë përfshirë gjithsej tri automjete. Sipas tij, sinjalizimi i parë për aksidentin është pranuar rreth orës 05:42 të mëngjesit, kohë kur u raportua fillimisht për katër të lënduar.
Njëri nga personat e lënduar nuk ka mundur t'u mbijetojë plagëve dhe ka ndërruar jetë pasi është transportuar në Spitalin e Përgjithshëm të Pejës. Vdekja e tij është konstatuar zyrtarisht nga ekipet mjekësore kujdestare në spital.