Aksident fatal në Tiranë: Motorri përplas për vdekje 75-vjeçaren

Një grua 75-vjeçare ka ndërruar jetë në spital pasi u përplas nga një motomjet në Rrugën e Dibrës. Drejtuesi 20-vjeçar është arrestuar nga policia.
Një ngjarje e rëndë ka ndodhur gjatë mbrëmjes së djeshme në kryeqytet, ku një grua e moshës 75 vjeç ka humbur jetën si pasojë e një aksidenti rrugor. Ngjarja është regjistruar rreth orës 19:35 në Rrugën e Dibrës, ku një motomjet i drejtuar nga një 20-vjeçar ka goditur këmbësoren.
Si pasojë e goditjes së fortë, këmbësorja ka pësuar dëmtime të rënda trupore dhe është dërguar menjëherë në spital për të marrë ndihmën mjekësore. Megjithatë, pavarësisht ndërhyrjes së mjekëve, ajo nuk ka mundur t'u mbijetojë plagëve dhe ka ndërruar jetë rreth orës 22:40.
Nga përplasja ka mbetur i lënduar edhe drejtuesi i mjetit me dy rrota, i cili ndodhet nën kujdesin e mjekëve dhe jashtë rrezikut për jetën. Autoritetet e policisë rrugore kanë ndërhyrë në vendngjarje dhe kanë bërë arrestimin në flagrancë të drejtuesit të ri, ndërkohë që materialet e referuara i kanë kaluar Prokurorisë për hetime të mëtejshme.